【有片】卓林再次搬離娘家 吳綺莉:我有宗教信仰,好多嘢都交畀神

吳綺莉(Elaine)今日出席一個慈善活動,訪問其間佢就透露卓林已經離開屋企,佢話:「大個嘞,要學習朋友與朋友之間要提醒,做事唔可以太快太急,每個人都有自己嘅觀點角度,唔可以迫人做唔鍾意做嘅事,有時越叫佢唔好做佢就會越做。」有勸過卓林留返喺屋企嗎?Elaine就話:「冇話勸嘅,等佢自己經歷感受。」係咪等卓林出去見識吓,遲啲會識返屋企?Elaine話:「只可以在旁提醒,越叫佢唔好做嘅就越要做,人就係咁。」
咁係咪鬥氣呀?佢話:「係年紀有關係嘅,人要自我反省,睇吓自己啱定唔啱,要時間去學習。」問到Elaine覺得卓林太太Andi幫唔幫到手?佢就話:「呢個唔太清楚。」至於講到經濟上嘅壓力,Elaine就話順其自然,問卓林之前去賓館住欠租要驚動警方,問到卓林事後有冇要求金錢上嘅幫助?Elaine話:「大家冇提起,冇得擔心,我有宗教信仰,好多嘢都交畀神,我有祈禱,盡量做好自己,人隨住年紀有經歷,但唔一定理想,唔係你可以控制到,只可以做好自己。」
至於提到卓林之前接受傳媒訪問嘅時候,曾經提及喺上海讀書時遭同學欺凌,問到Elaine知唔知情?佢就話:「呢啲係過去嘅嘢,要從中學習,發生咗事應該係用正能量去諗解決方法,好多嘢係有正面同負面嘅睇法,睇吓用咩方法去處理。」至於兩母女仲會唔會傾心事?Elaine就話:「我做畀佢睇多過傾,我會自己做畀佢睇,身教重要啲,我會多做番啲正面嘅嘢畀佢感受。」最後問到Elaine最近咁多事情發生,卓林父親成龍有冇聯絡?Elaine就話:「唔關我事嘅問題唔答。」

https://www.youtube.com/watch?v=2sXzPSacQ48
(資料來源:網上截圖/連結)