【有片】馬國明拎萬元現金抽獎慶功 老婆本要再儲過

馬國明同陳煒憑住《宮心計2深宮計》,分別喺TVB頒獎禮最受歡迎電視男、女角色,今晚一齊喺灣仔一間餐廳請食飯。
馬國明話陳煒同食肆相熟,已經拎到優惠價,自己唔好意思只係夾一份錢,所以自掏腰包做現金抽獎,好希望幕後工作人員可以抽到,一齊分享喜悅。問到準備咗幾多?馬國明話:「都好多吓,隨時可以加碼,o依家都有5位數字現金,希望大家開心,老婆本都拎埋出嚟,所以冇阿蕭咁快結婚。」
呢幾年頒獎禮都傳佢可以拎到視帝,但次次都落敗,會唔會失望?佢話:「入圍嘅人都係三份一得獎機會,台慶嗰日都回應咗好多,總之都冇失望。今次有獎都係超額完成,本身諗住係提名男配角,台慶嗰晚得獎嚇一嚇,阿蕭話結婚又嚇一嚇,所以嚇到幾呆,自己有冇獎拎都係呆。拎獎係天時地利人和,就算自己冇獎拎都會參與,去戥人開心,全部都係朋友。」

https://www.youtube.com/watch?v=VAQEzjQCwZA
(資料來源:網上截圖/連結)