【珍惜眼前人】 謝霆鋒激罕談愛情觀 珍惜王菲放手栢芝

謝霆鋒嘅愛情世界兜兜轉轉,佢同王菲世紀復合4年,兩人不時被影到孖住出遊,戀火持續升溫,但未傳出有再婚計劃;而霆鋒嘅前妻張栢芝上月誕「小王子」,生父身份成謎;霆鋒同栢芝離婚7年,一直絕少提感情事嘅霆鋒,近日喺自己嘅節目中罕有談感情觀:「能夠珍惜的時候就珍惜,但是要放的時候,也真的得放。」
霆鋒主持嘅《鋒味》第二季,在播出嘅最新一集中,跟大陸女星宋茜到捷克,與當地一名80歲老太太交流美食心得,其間老太太突然問霆鋒:「你結婚了嗎?」搞到霆鋒有啲尷尬,諗咗一諗話:「還沒!」身邊嘅工作人員都忍唔住發出笑聲。
原來呢位老太太係大陸人,20幾歲時愛上來自捷克嘅老公,之後就嫁雞隨雞,離鄉別井到捷克生活,可惜老公卻一早走了!老太太屋企每個角落都擺滿亡夫相片,至今依然念念不忘。老太太叮囑在場嘅攝製隊:「你們要好好保護你的妻子,保護你們的丈夫,因為你們老的時候,一個人是非常孤獨的,只有你們的老伴,才能讓你們心裏頭安靜,真的。」
之後畫面一轉,霆鋒獨個兒對着鏡頭自白:「她忠告我們一定要珍惜我們身邊的人,能夠珍惜的時候就珍惜,但是要放的時候,也真的得放。」

(資料來源:網上截圖/連結)