【45億女婿】「吳家樂」孖家人遊東京, 一家五口好溫馨

0
12944

豪門女婿吳家樂同有米老婆周蕙蕙結婚13年,現育有3名子女,包括12歲大女Nadia及10歲孖仔Nigel、Nathan,一家五口樂也融融,日前吳家樂夫婦帶3名子女到東京迪士尼玩,被讀者何先生透過「爆相爆片」分享溫馨樂。

何先生接受電話訪問表示:「嗰日朝早6點半,我喺新宿嘅酒店等專車去迪士尼,見到佢哋一家五口排隊上車,佢哋全程好有禮貌,講嘢好斯文,唔會嘈喧巴閉,兩公婆好恩愛,對仔女照顧無微不至,吳家樂落車後即刻幫仔女圍好頸巾,完全係傳聞中嘅廿四孝爸爸。」

家樂嘅外父係已故其士集團主席周亦卿,周亦卿於去年7月離世,估計其遺產最少達45億元。當年家樂同周蕙蕙秘密拍拖,06年被爆排期結婚,戀情才正式曝光,06年3月19日兩人在金鐘嘅酒店筵開12席婚宴。由屋邨仔變豪門女婿嘅家樂,婚後13年零緋聞,咁多年兩公婆都好恩愛,而身為千金小姐嘅周蕙蕙,生活十分低調,專心相夫教子女。

16年家樂喺大台頒獎禮獲「專業演員大獎」,佢喺台上激動落淚感謝老婆鼓勵:「冇諗過有機會攞獎,好多人想多謝,在心中,好多謝父母、老婆…老婆話:『好在你唔係好紅,多時間陪我哋!』老婆我愛你。」