馬德鐘驚喜Fans拎CD要求簽名

馬德鐘喺聖誕節正日現身灣仔出席活動,佢同入場觀眾唱歌玩遊戲,歡度佳節,現場有唔少Fans,有fans仲拎住馬德鐘嘅CD要求簽名,佢自己都笑言:「嘩!你竟然有呢一隻, 我屋企仲有啲存貨,下次攞出嚟派畀大家。」
聖誕節都要工作,馬德鐘話:「好開心因為放假出街好多人,反正屋企人冇乜節目,出嚟做嘢同大家慶祝仲開心。」佢透露正喺外國讀書嘅囝囝近日趁聖誕假返香港,問到攞到視帝後有冇同屋企人慶祝?佢話:「其實又冇特別慶祝,不過我今日出門口見到個仔偷偷地整蛋糕,唔知係咪整畀我呢。」
馬德鐘仲話好感恩過去一年拍嘅劇大家鍾意亦攞到獎:「證明到畀老婆睇我當初係冇錯行,雖然都用咗十幾年時間。」問到嚟緊新一年有咩工作計劃?佢話:「暫時未有咩具體,希望電影同電視劇都可以參與。」問到有冇加價?佢笑言:「咁點都要加少少,都要跟返通脹嘅。」

(資料來源:網上截圖/連結)