試過寫信畀志偉冇回覆 曾寶儀:嗰陣成日埋怨爸爸

曾寶儀出席張艾嘉嘅果實基金會喺台灣舉行嘅交流對談會,雖然曾寶儀同爸爸曾志偉喺演藝事業上經常以「父女檔」現身,感情似乎相當好,但事實上因為志偉與第一任太太、即係寶儀嘅媽媽好早已經離咗婚,寶儀喺3歲就同妹妹移居台灣由爺爺嫲嫲照顧,所以喺童年時期,佢哋嘅關係好疏離,寶儀曾經用「最熟悉的陌生人」去形容爸爸。
喺交流會上,曾寶儀話嗰陣成日埋怨爸爸:「每次父親節,學校要寫什麼卡片、還是畫什麼?我都不知要寫什麼,畫的形象都是以我的伯父或叔叔為想像。爸媽分開之後,我從小就有不安全感,覺得隨時會被丟下,我小學就準備好行李要帶什麼,偷存錢,我怕我會被遺棄。」佢仲話以前試過寫咗5年信畀志偉,但係佢完全沒有回覆過:「以前就是哭啊,尤其知道爸媽吵架,更有不安全感,後來慢慢長大,覺得跟他們的人生問題切割,把自己過好,可能還能反過來幫他們。」
不過當寶儀入咗娛樂圈之後,父女嘅關係好咗好多,喺佢身上學到唔少處事方法,寶儀話記得有一次畀周刊偷拍仲做埋封面,佢即刻打電話畀志偉:「他問我另一本政治版封面是誰,我說是陳幸妤。結果他說,很好啊,一個是總統女兒,一個是曾志偉女兒!」結果寶儀話聽完就笑咗出嚟,慢慢學識咗放低。

(資料來源:網上截圖/連結)