軒仔賀小斌女38歲牛一 祖兒阿Sa攬實壽星仔狂啜

「小斌女」關智斌(Kenny)慶祝踏入38歲生日,噚晚舉行bling bling主題派對狂歡,曾經同Kenny關係密切嘅張敬軒都有到賀,仲有容祖兒、蔡卓妍(阿Sa)、鍾欣潼(阿嬌)、張致恒、謝霆鋒、古巨基同老婆Lorraine化行妝出席,祖兒同阿Sa攬實壽星仔狂啜,飲到面紅紅嘅Kenny單眼放電high爆。
Kenny在社交網搞鬼寫道:「又大一歲啦!終於18歲啦!前嗰幾年都喺劇組度過,加上性格低調#應該係,所以都好少搞生日會,不過今年一班好sweet嘅朋友話要搞大佢喎,佢哋仲好開心咁諗咗主題Dress code #blingbling,話要畀一個Surprise party我,其實就唔係好surprise,你哋邊守到秘密㗎,我仲有史提芬咁大支針喺度。不過有啲咩朋友嚟我又真係唔知道,真係好窩心同感動!好多謝你哋呀,所以我特登將其中一個生日願望許願送咗畀你哋,不過我唔可以講,唔係會唔靈。」
祖兒就留言大讚壽星仔:「祝神州第一美男關智斌永遠顛倒眾生,Bling bling之夜閃到眼盲,大家都好熱血,有人靚仔過做騷,古sir件衫熟口熟面,小鳥爆開了。」出動演唱會dancers衫嘅基仔抵死話:「有邊個知道我最偉大的志願係做小斌斌嘅Dancer呀~~Happy birthday Handsome Boy!」

(資料來源:網上截圖/連結)