彭浩翔執到賀歲片『恭喜八婆』

梁詠琪(GiGi)同陳逸寧今日喺灣仔為彭浩翔執到賀歲片《恭喜八婆》開工,GiGi身穿女警服扮演PTU,佢之前做過交通警又做過海關,今次好彩唔使拔槍,佢話:「 好多鬧交戲,好似戲名咁八婆就最鍾意鬧交,今次客串身份拍賀歲片好開心。」
而導演彭浩翔就飾演GiGi前度男友,GiGi話:「件事好高難度,我要質問佢,佢鍾意扮啲衰衰咁嘅態度,但我唔會驚佢,佢鍾意越衰衰地越開心嘅感覺,好有火花, 所以將來我哋扮情侶都唔係冇希望。」客串短短幾日,但GiGi仍未睇哂劇本,只係聽過導演講解個故仔,不過佢話對上同彭浩翔合作已經大約三、四年前。
GiGi話要穿上戲服扮女警好多規矩,佢話:「要守行為啲,唔使埋位時候我都著返件外套,驚人哋以為係真,頭先有路人問我拍緊乜,我就話拍緊《警訊》,好難同人講拍緊八婆,驚以為我話緊佢。」
彭浩翔話呢套賀歲片開得好急,22號前就要完工,再趕做後期製作,其餘拍攝藝人包括有四哥謝賢、曾國祥、楊千樺、黃明志等等,至於余文樂,彭導演就話:「睇下個期得唔得,更重要就係我飾演GiGi前度男友,佢著數咗啦,可以畀佢鬧我。」
另外,彭浩翔第一套執導拍攝嘅電影《買兇拍人 》係獲得鄒文懷支持,由小說改編成電影,當時冇人相信可以變成事實,所以聽到鄒生離開消息好震驚,而對上一次見面已經係回歸十週年活動時候,大約2006年左右。


(資料來源:網上截圖/連結)