吳若希晨早煮早餐 未獲老公欣賞

吳若希同菊梓喬今日喺將軍澳出席「甜蜜遊樂早餐派對」揭幕禮,活動中,穿上綠色吊帶裙嘅吳若希俯身煮早餐,好彩冇走光,事後佢笑住話:「我出名3個字,我叫『高瘦平』,係Benz雄(許紹雄)幫我改,佢賜咗呢個朵畀我,所以好安全,我都冇黐膠紙,淨係著nube bra。」相反,菊梓喬擔心會走光,露出半個胸,所以佢要黐膠紙做足安全措施,「我條裙得一邊帶,我驚甩出嚟。」
講到廚藝,吳若希指噚日煮早餐,不過老公以「趕時間返工」為理由冇食到:「我煮奄列,好靚同好味,平時佢都有試過我手勢,佢好溫柔咁同我講『不如唱番歌,我鍾意聽你唱歌多啲。』成件事好warm,其實已經好好,我老公到o依家仲係生勾勾喺度。」菊梓喬則話:「我都識煮正常食得嘅嘢,都熟嘅,所以做我男朋友好幸福,我煮過盆菜、節瓜炆排骨、炒西蘭花。」現時單身嘅佢,會唔會學廚做個合格人妻?佢話:「我想拍拖先結婚,希望今個聖誕節有男友陪我過。」

(資料來源:網上截圖/連結)