【恭喜】吳日言公佈陀B女 臍帶纏頸考慮剖腹生

預產期在本月尾嘅Yan,一直保持神秘未有透露BB性別,佢終於喺facebook開live,自爆佢係陀住小公主。Yan仲話之前做咗個統計,發現身邊好多人話佢肚尖,佢又有啲面形扭曲同埋個鼻大咗,BB一定係男仔,但其實大家都估錯,BB其實係女仔。
Yan接受傳媒訪問話:「係呀,BB係女仔嚟o架,所以啲人成日話睇媽媽外型,就會知道生仔定生女,我覺得呢啲都係斷估,好似我咁,個個都話係囝囝,但都係錯晒。」
臨盤在即,一直希望順產嘅Yan日前做產險,醫生發現臍帶有少少纏住BB條頸,所以可能最後要開刀。Yan話:「我係好想順產嘅,依家等下先囉,我都冇堅持嘅,最緊要BB安全,會聽醫生嘅意見,惟有睇BB到時乖乖自己出嚟,定係要開刀啦喇!」
早前Yan同老公去沖繩旅行,順便影咗輯大肚相,佢話成輯相都係老公操刀,因為著咁少布唔好意思俾人影。Yan笑住話:「俾人影覺得好尷尬,而且老公都覺得大肚婆影相其實影唔到美態,我仲覺得自己好似大蜘蛛咁,所以沖繩有靚景就喺嗰邊影埋。」

(資料來源:網上截圖/連結)