【有片】農夫18週年生日會 人氣大測試

組合農夫噚晚喺旺角麥花臣場館舉行演唱會,觀眾開始入場時,佢哋已率先坐喺台等候,台上係一個擺酒迎賓格局嘅佈置,任由觀眾上台前合照同問佢哋問題。正式開騷之後,農夫請咗喺台下睇騷嘅余德丞上台,陸永話:「佢暈完醒番,估唔到佢第一樣嘢係走去買飛,仲係俾錢買飛睇,你唔好怪我哋冇去探你喎!」C君接住話:「本來我諗住去探你時做直播。」陸永再話:「其實余德丞嘅故仔好感人,嗰個人當時真係嚇我一跳,但佢醒番嗰下即刻去買我哋飛,但嗰時我哋係未開賣㗎!」
跟住佢哋同觀眾講今次係佢哋18歲生日會,叫觀眾唱生日歌,觀眾唱英文版生日歌嗰陣,佢哋就話唔係呢首,繼而哼出無綫台慶生日歌,然後話:「你哋去人哋個生日會,唔會期待人哋個生日會會好好睇,得佢(無綫)生日會係會好睇。」
農夫又分別多謝呢18年嚟幫過佢哋嘅人,首先係經理人DJ Tommy,銀幕同時打出佢哋18年前嘅合照,陸永話:「18年前收養咗我哋,佢當時望住我哋個樣應該諗,呢兩個人有得做,呢啲曠世奇才樣一定興。」C君跟住笑住話:「佢當年走頭冇路,知道冇人會再搵佢打碟做DJ,所以做經理人,人盡可夫呀!佢想我哋唱歌,但我當時想做DJ嘅。」
另外,農夫又多謝前老闆陳冠希:「佢曾經係我哋嘅老闆,出過幾張唱片,《O’FAMA》嘅碟仲令到我哋收到人生第一封律師信,件事關乎兩個韓國團體嘅事,咁啱團體有醜聞,其中一個團體發律師信,要求我哋將YouTube MV下架,我哋當然有下架,不過其他網民即刻post番上去,其實LMF啲歌仲勁啦,但佢哋從來冇收過律師信。」
去到Encore部份,嘉賓麥玲玲同農夫合唱完《風生水起》後,就派利是俾佢哋,當俾到陸永嗰陣,玲玲就話:「俾你做首期買樓。」俾C君時又話:「俾你買太空船。」兩人拆開發現都係500蚊,就即場揀咗位噚日生日嘅觀眾,將兩封利是送俾佢。
最後農夫話:「經歷過咁多,所以同事都叫我哋寫啲歌唔好咁偏,做多啲商業嘅歌,有次畀DJ話我哋咁老土仲rap,香港o依家已經唔興,個DJ都幾前衛,唔係睇到個施政報告就話『嘩 !仲填海呀!咁老土。』,之後我哋曾經寫過一首情歌。」C君仲話好想移民返去以前嘅香港,當時嘅時光好美好。壓軸嘉賓係農夫已離隊嘅兩位舊成員,4人再上台合唱兼合照。

(資料來源:網上截圖/連結)