【有片】港台用心製作 火速救兵 IV:守破離(上)

喺上月中播映嘅港台新一輯《火速救兵IV》,唔少觀眾睇咗第一集嗰3分半鐘一鏡到底嘅片段、再加上飾演爆人王歐錦棠嗰場火場,已經睇到觀眾嘩嘩聲,有網民喺網上仲話每一集得嗰20零分鐘,完全唔夠喉
其實《火速IV》每一個單元都會有唔同驚喜,好似喺今晚播映嘅第三個單元、一連兩集嘅《守破離》,搵咗林文龍、梁雍婷、張滿源、袁彌明、寶珮如等演出,主要係介紹救護員工作嘅故事。大台嗰套《跳躍生命線》啱啱先播完,雖然大家都係講救護員嘅故事,不過《守破離》除咗講林文龍同個仔、梁雍婷同寶珮如二個家庭嘅故事之外,當然仲有好壯觀嘅救人場面!
好似喺第一集裡面,有一幕故事講述地鐵站發生縱火事件,呢個場口唔單止喺地鐵站實景拍攝,劇組動員咗過百名義工同臨時演員與拍攝,為咗唔影響地鐵嘅日常運作,拍攝工作要喺深宵進行,拍攝時間仲只係得短短三個鐘,最後當然係順利完成!之後去到第二集,嗰一幕大型交通事故,亦會係另一個焦點!今次係林文龍從影咁多年,第一次飾演救護員,佢喺製作特輯嘅短片話:「今次合作好開心,好多阿Sir喺拍攝兄嘅時候,不厭其煩咁講咗好多要注意嘅嘢,我真係學到唔少嘢!」
林文龍接受傳媒嘅電話訪問話:「其實唔止我,佢哋都好開心,估唔到我會去拍,今次咁啱夾到時間,所以咪幫港台拍下啲咁正面嘅故事,等多啲人認識救護工作!」佢仲話:「基本上平時喺街見到救護員,除非係有需要先會接觸到,同我想像中嘅救護員係咪一樣?我又冇刻意去咁諗個問題,反而係今次係牽涉好多專業對白同救人嘅手勢,呢啲係唔可能出錯,所以喺拍攝過程都有好多救護員喺現場教授,之後再即場tone啲對白、再配合救人嘅手勢,喺呢方面係有啲難度。」
林文龍仲話:「佢哋啲傷者化妝一啲都唔馬虎,係意料之外嘅事,好似燒傷啲傷口同真實嘅相似度係高好高,連啲救護員都係咁講。」後來又講到下一集嘅巴士車禍,佢話:「兩場戲都拍得好辛苦,我未睇番啲片段。」至於近期有冇過睇過消防處嘅吉祥物「任何人」?林文龍就話:「未呀,等我得閒去睇吓先!」

(資料來源:網上截圖/連結)