海俊傑放棄賺人仔 舉家回流返港定居

楊千嬅、丁子高、海俊傑、杜德偉、黃智賢 、黎燕珊、任達華、溫碧霞、關楚耀、毛舜筠、關智斌、薛家燕、韓君婷、呂良偉、鍾欣潼等人,今日現身跑馬地,出席傳媒周年活動,千嬅夫婦逗留一會離去,未有接受傳媒訪問。
日前被傳媒影到與女友人態度親暱相約嘆茶的海俊傑,今日受訪時表示,佢最近喺香港簽咗新公司,故拍完手頭上啲劇集後,會飛返北京收拾所有嘢,稍後會遷回香港定居。問佢太太係咪會同行?海俊傑話:「會,會一齊返嚟,佢當然會跟住我啦!(睇咗報道都冇嬲?)明眼人都知,佢係我公司小師妹,太太都識得佢,之後我哋會一齊拍片放喺YouTube。」講到兩人態度親暱?海俊傑就話冇,「嗰度大風,佢話凍又冇褸,吹到成面頭髮,係朋友幫下啫,就算下次同再下次都會咁做,係友誼!」
另外,杜德偉(Alex)今日同老婆、囝囝一家三口都有出現,囝囝仲經過悉心打扮,戴帽又著咗西裝褸,十分可愛。Alex講笑話,趁囝囝未有話事權,將自己鍾意嘅衫放喺佢身上,好似迷你版自己咁,老婆都鍾意咁做。問佢哋有冇家庭裝?Alex話:「少啲,但係有父子裝,不過未有一套好滿意,因為買唔到百分百一樣。(會唔會自己整?)咁又太花時間,不過發現囝囝都幾貪靚,同自己一樣鍾意戴帽,試過攞我啲帽戴完去照鏡。」

(資料來源:網上截圖/連結)