【娘娘開新劇】佘詩曼:今次係做好人

佘詩曼今晩去咗圓方出席活動,同場仲有意大利退役球星簡拿華路。活動上,阿佘身上戴住共500萬鑽飾,非常貴氣,問佢私下係咪都收藏咗好多珠寶?阿佘笑笑口話:「唔好咁講,仲要努力,我鍾意啲輕便同簡單嘅款式,不過有陣時去啲隆重場合,都要襯返隆重嘅款式,嗰陣會問返媽咪借,佢平時出席好多飲宴,所以有好多呢啲款!」
近排阿佘頻頻四出接Job搵真銀,唔知幾時會開新劇呢?阿佘就話:「可能年尾或者年頭會開工,今次係30年代背景嘅大陸民初劇,係做好人,媽咪見到我嘅枱面有一大叠劇本,佢都關心問吓我今次拍乜嘢,不過詳情仲未知,希望可以喺香港過埋聖誕同大除夕先。」

(資料來源:網上截圖/連結)