【有片】11.17國際刪除好友日 那一類臉書朋友需要Unfriend?

社交網絡係都市人生活嘅一部份,同朋友出街食完飯,返到屋企就會喺Facebook、Instagram見。喺Facebook入面,識嘅、唔認識嘅、陌生嘅、熟悉嘅朋友通通都有,friend list破千係閒事。其實加咗咁多朋友,係好事定壞事?美國節目主持人Jimmy Kimmel深信朋友貴精不貴多,仲喺2010年發起「國際刪除好友日」,鼓勵民眾喺11月17日刪除假好友。Jimmy認為大家對於以下五類朋友唔可以留手,應該要速速delete。
第一類就係N年冇聯絡嘅同學。Jimmy認為呢啲同學只係回憶,現實中根本就冇聯絡,冇友誼可言,所以可以unfriend。第二類係瘋狂洗版「朋友」。呢類人經常post唔停手,自拍、美食、旅行相當然唔少得,事無大小都會出post,睇得多都覺得煩,倒不如同佢講bye bye啦!第三類,偶然認識但從未再聯絡嘅「朋友」。平時去party,同人傾多兩句之後好自然就互add Facebook,但之後見都冇見過……呢啲仲叫朋友?Unfriend咗佢啦!第四類,前度們。分手後,見到ex同其他人玩嘅相,好容易搞到自己亂諗嘢兼唔安樂,倒不如實行再見不是「朋友」,喺Facebook踢走佢,換來耳根清靜。第五類,瘋狂放閃「朋友」。呢類人最愛炫耀,同另一半撐枱腳、阿囝贏獎牌、旅行美照…..放閃放成咁, 覺得頂唔順?一個刪除掣就幫到你!
如果你猶疑緊唔知點先算係「朋友」,Jimmy亦有建議畀大家。如果你連五十美元都唔想借畀嗰個「朋友」,唔想佢嚟你嘅生日party;甚至佢俾巴士撞到都唔覺得難過……呢啲朋友冇咗都唔會心痛,就可以趁住11月17號unfriend佢哋。想知香港人點睇Facebook入面最難頂嘅朋友類型?立即去片!

https://www.youtube.com/watch?v=xo0RIs8ZXSg
(資料來源:網上截圖/連結)