【美少女戰士合體】周慧敏下月開始做巡迴

周慧敏(Vivian)今日喺屯門出席活動,對於喺下月1日開始做巡迴演唱會,Vivian就透露「美少女戰士」到時會合體:「內地第一站係東莞,呢站會有『美少女戰士』,之後就佛山,直至下年8月,除咗內地場,仲有東南亞,我啲支持者等咗好耐,場館終於批,我好開心,30年喇,每做一次就少一次,每次都當係最後一次嘅心態。」
至於香港會唔會係最後一站,Vivian話:「未諗到咁遠,12月中會出演唱會專輯,安撫住啲fans先。」問到聖誕節同農曆新年係咪要喺工作中度過?佢話:「我會放假,我好重視聖誕節,會同老公一齊過,亦會去做崇拜。(朝聖?)會呀,我已經請咗下年5月嘅假,我會去以色列,係我人生嘅第3次。(老公倪震去唔去?)等佢考慮下,因為佢已經去過。」
問Vivian啱啱過咗嘅生日(10日)點慶祝,佢就話去咗大陸做演出,但前一晚老公就同佢慶祝,而且仲有驚喜添。
此外,對於金庸離世,問Vivian老爺倪匡心情有冇受影響?佢話:「我諗佢係一個睇得化嘅老人家,都唔係第一次,我相信佢都有足夠嘅心理準備去面對,我嚟緊都會見佢,我哋定期會見面,(老爺係樂觀嘅人?)佢好樂天,好睇得開,所以唔使擔心。」

(資料來源:網上截圖/連結)