譚嘉儀入行七年首次出大碟

譚嘉儀入行七年,噚日終於推出首張個人大碟,今晚仲專程去到旺角一間唱片店擔任店長,Fans到場幫襯之餘,仲送花祝賀。今次推出大碟係事出突然,因為公司見到佢同關楚耀首合唱歌《Lonely》反應好好,於是乘住個熱潮幫佢出碟。
歌手們都有個習慣買番自己隻碟取好意頭,嘉儀話:「我唔只買一隻,會買好多隻,因為咁多年嚟好多人幫我,好想親手喺碟面寫啲嘢多謝佢哋。」至於出碟會否增加年尾頒獎禮得獎信心,佢就覺得出碟係自己事業上一個里程碑,係一個紀念去鼓勵自己,所以唔會令得獎信心增加,佢話:「短期內希望開到個音樂會,同歌迷近距離接觸,因為未曾開過騷。」

(資料來源:網上截圖/連結)