【小學都頂唔順】康子妮嘆功課太深

0
127

林曉峰(阿Lo)同太太康子妮(Lily),今日為ViuTV節目《超級奶爸2》擔任嘉賓,已有一對囝囝嘅阿Lo同Lily湊仔經驗豐富,問佢哋有乜特別秘訣?阿Lo話:「我負責情感科,盡量抽時間陪佢哋,但我都係嚴父,但Lily就仲嚴啲,因為佢負責功課同日常生活。」Lily話:「我覺得最重要係禮貌、待人處事,因為功課方面,我跟到一半已經跟唔到,小學嘅中文已經好深。」阿Lo又補充:「我試過喺佢哋四年級嘅時候幫佢哋作文,但我都頂唔順,交唔到,因為寫唔到咁多嘢,點解o依家啲嘢咁深架!」
講到阿Lo負責情感科,問到15歲林寶同14歲林熙有冇拍拖問題﹖Lily就話:「大仔同女朋友散咗,我話:『嗰個女仔好好o架喎,點解散呀?』,佢話我唔明,隔咗一段時間,我終於明白點解,我話佢做得好,其實要徹底明白佢(大仔)係要花時間,亦要喺啱嘅時候同佢傾心事。」
問到囝囝會唔會帶女友見家長﹖Lily話:「起碼拍咗兩、三個月拖佢先會講。」阿Lo仲透露會負責兩個囝囝嘅性教育同粗口,因為呢兩科都係自己嘅強項,而Lily則笑住話:「佢哋好清楚,我兩個仔都好斯文,反而有時佢哋叫我哋唔好講。」

(資料來源:網上截圖/連結)

LEAVE A REPLY

Please enter your comment!
Please enter your name here