【王菲兩個女】童童替韓星紋「罪」字 李嫣初登雜誌封面

49歲王菲今年8月參與大陸綜藝節目《幻樂之城》演出,傳要一億元人民幣酬金先請得郁天后登場,最後一集仲有兩個女竇靖童同李嫣一齊上台,真係好難得。
21歲竇靖童係王菲同竇唯所生,而12歲李嫣就係王菲同李亞鵬所生;但兩個女都遺傳父母演藝細胞,對娛樂圈甚有興趣。童童已經出道做歌手,而且好喜歡紋身,韓國人氣樂隊Hyukoh嘅主音吳赫噚日喺ig貼咗童童為佢紋身時拍攝嘅相片,佢透露早前去北京與童童見面,吳赫幫童童喺前手臂紋咗兩隻螞蟻,竇靖童就幫對方喺小腿紋咗一個「罪」字。見童童啲書法都好有個人特色,似係cute版,反而吳赫嘅螞蟻圖案甚具專業水平。
而年紀輕輕嘅李嫣近年獲唔少品牌睇中邀請行騷,早前為巴黎時裝周行catwalk,最近更首度登上雜誌封面,換上多套服裝,散發少女青春氣息。李嫣表情多多,一時調皮,一時勁Chok,網民都大讚佢越來越有王菲嘅氣質,而樣貌就似足爸爸李亞鵬。
李嫣喺訪問中分享生活,仲想同關心佢嘅人講一聲:「我長大了,謝謝!」今年9月時,李亞鵬接受大陸媒體訪問,被問係咪好期待李嫣加入演藝圈?佢話會尊重女兒意願,而早前行騷大多為慈善公益,佢話﹕「跟她進不進娛樂圈沒關係!」此外,李亞鵬喺另一個訪問中透露,自出世就有唇腭裂嘅李嫣,今年八月接受了一次階段性嘅手術,仲要全身麻醉,但李嫣一點恐懼同緊張都冇,反而李亞鵬有點不安,李嫣仲要求同爸爸自拍一張才入手術室,令李亞鵬等女兒做手術期間,悄悄地喊咗出嚟。

(資料來源:網上截圖/連結)