【有片】老婆下令封口 準人父鄭嘉穎:開心過攞獎同中六合彩

鄭嘉穎同太太陳凱琳早前喺互聯網公佈成功造人,即將榮升做爸爸媽媽,今日鄭嘉穎同陳凱琳分別見傳媒分享喜悅,不過嘉穎就同老婆有共識,會由太太交代bb嘅事,自己不敢多言。
鄭嘉穎今日喺新蒲崗宣傳電影時接受訪問,心情大靚嘅佢同大家講定恭喜發財,佢話:「心情開心過攞獎同中六合彩,難以形容,好喜悅非筆墨能形容,太太叫我唔好講咁多關於bb嘅嘢,佢比較緊張,大家問返佢,依家全家上下都緊張到不得了。」並透露太太身體狀況一切正常,但就好驚佢講錯嘢,而好友黃智賢就暗示鄭嘉穎呢胎係囝囝。
嘉穎第一次從超聲波睇到bb個樣,係一個難忘經歷,佢都有向身邊朋友取經,因為身邊唔少人都已經係爸爸,好同唔好嘅榜樣都有晒。嘉穎話:「依家開心多過緊張。」至於問到佢係咪bb仔?佢就話:「你問我太太啦,佢叫我唔好講咁多,交畀佢講。」佢已計畫攞假陪太太生產,應該有機會入產房,但詳細如何仍未知道,而實際預產期佢只肯透露係豬年,其他叫大家問返太太。

https://www.youtube.com/watch?v=fqO1i3zFFY4
(資料來源:網上截圖/連結)