【恭喜晒】專登揀生日剖腹生女 董敏莉:以後可以一齊慶祝

董敏莉(Monie)喺今年7月宣佈自己有「第三者」,預產期係今年12月。今日終於傳出喜訊,Monie同律師老公莊耀金嘅「第三者」終於誕生,噚日Monie開刀誕下女兒,重7.2磅。
噚日除咗係小公主出世嘅大日子之外,亦係Monie嘅38歲生日,佢話:「我專登揀呢一日開刀,方便以後一齊慶祝,點知囡囡唔單止同我同月同日,連磅數都係一樣,真係緣份!」講到囡囡個名,佢話:「我哋一早已經幫佢改好名,中文名叫子子,英文叫Martha。成個過程都好順利,老公喺產房陪產,o依家會餵人奶,希望畀到最好嘅營養BB。」
不過喺第一次產檢,發現有子宮肌瘤,Monie話:「其實過程都有驚險,因為肌瘤都好大,阻住產道,所以醫生一早經已話要開刀,冇得順產,佢講明有危險性,驚失血過多,有二千分之一機會要切除子宮,好彩醫生盡力幫我止血,大小平安,可能半年之後要做手術切除肌瘤。」
工作方面,Monie會先休息兩個月,之後再慢慢復工:「電台主持嗰度我就請咗兩個月假,陀b嗰陣都有好多媽咪級嘅廣告搵我。」至於會唔會母女檔拍廣告?佢就話:「咁長遠梗係未諗,如果阿女好似我咁靚,爸爸又准許嘅話,我都唔介意佢入行。」

(資料來源:網上截圖/連結)