喬妹婚後最新力作《男朋友》必睇五大理由

由韓國神劇《太陽的後裔》女星宋慧喬夥拍《雲畫的月光》男星朴寶劍主演嘅tvN新劇《男朋友》,今日終於首播。《男朋友》為水木劇,於韓國時間逢周三及周四晚9時30分播出,喺韓國播出後四小時,港迷就可以喺Viu app同步追看。《男朋友》未開拍已經受到各界關注,事關《男朋友》係喬妹婚後復出之作,加上朴寶劍都有成兩年冇新劇,自然未開播已經成為熱話。
(一)喬妹婚後復出
睇《男朋友》估計大家都因為係喬妹婚後復出之作關係,喬妹同宋仲基於去年10月31日結婚,喬妹之前拍完《太陽》後一直冇接新作品,直至結婚後佢都專注享受新婚之樂,到早前佢落實接拍由《嫉妒的化身》導演朴信宇孖《七號房的禮物》編劇劉英雅嘅作品《男朋友》,令到大家都好期待喬妹嘅新作。而另一個焦點就喺朴寶劍身上,朴寶劍同宋仲基既是朋友又係同門師兄弟,佢自2016年《雲畫》之後千揀萬揀終於揀咗《男朋友》,估計《男朋友》必有過人之處,佢先二話不說即刻拍。
(二)古巴靚人靚景
近年大熱韓劇都會去外地取景,好似《太陽》、《鬼怪》咁都會去外地拍攝,今次《男朋友》亦有遠赴古巴進行拍攝,仲喺當地拍攝咗成個月,喺靚人靚景下自然將當地嘅異國風情盡現觀眾眼前,觀眾睇劇之餘亦能欣賞當地嘅風景,如果劇集爆紅,仲會帶挈當地嘅旅遊事業。
(三)姊弟戀夠煞食
《男朋友》由37歲嘅喬妹夥拍25歲嘅朴寶劍,兩人無論年齡同外表都無疑屬於姊弟戀,喺劇中喬妹將飾演車秀賢一角,係國會議員、首爾市長及黨代表嘅千金,雖然貌似擁有一切,但喺大學畢業後馬上被家人安排與不相愛嘅人結婚,成為大企業二公子嘅妻子,同時亦係幫助父親上位嘅犧牲品。而朴寶劍則飾演乜都冇兼毫無特別嘅平凡男人金振赫,二人面對生活和財富嘅選擇,要抉擇應該選擇咩日子過生活。
(四)tvN劇必屬佳品
近年免費台電視劇無論口碑及收視都越來越差,反而收費台就越做越好,喺製作同劇種方面,收費台會不斷搵新題材,令到收費台收視近年同免費台睇齊,更有超前之情況。當中tvN方面嘅劇集就不時成為話題焦點,好似今年佢哋出品嘅《陽光先生》、《金秘書為何那樣》、《百日的郎君》等都叫好又叫座,而《男朋友》亦屬於tvN出品,同時亦係喬妹首齣出演tvN嘅作品。
(五)Viu同步免費睇
之前劇迷要追韓劇都要搵途徑,而今次《男朋決》就落實喺「黃Viu煲劇平台」同步睇,到時港迷可於韓國首播後四小時內,喺「黃Viu煲劇平台」免費追看繁體字幕版,今次仲要係Viu繼《太陽的後裔》、《鬼怪》之後,再次成功奪得重頭劇《男朋友》嘅播映權。至於台灣方面就由愛奇藝獨家跟播,星馬印地區則由tvN Asia於韓國播出後24小時內播出。

(資料來源:網上截圖/連結)