【有片】【失聲頂硬上】汪東城無奈被扯入炎亞綸感情風波

日本人氣動漫《櫻桃小丸子》嘅作者櫻桃子在今年8月逝世,曾喺真人版《小丸子》劇集中演「花輪同學」嘅台灣前組合飛輪海成員汪東城(大東),早前特地到日本出席櫻桃子嘅悼念活動
今日大東喺台北西門町擔任小丸子專門店一日店長,可惜佢「失聲」上陣,原定唔接受傳媒訪問,最後仍見傳媒,但全程以氣音發聲,無論講嗰個定聽嘅人都相當辛苦。
據知,原來大東前兩日到哈爾濱出席活動,當地氣溫低至零下16度,大東受冷感冒,導致支氣管發炎,已經失聲數日,更因此要取消噚日商演嘅唱歌環節,病情唔輕。
大東被問到舊隊友炎亞綸早前鬧出感情風波,明明曾被傳不和嘅大東無端被扯入,仲有大陸網民指林宥嘉嗰首《浪費》係講炎亞綸暗戀大東嘅故事,大東聞言後一臉難以言喻嘅表情,之後話:「要問林宥嘉吧,我怎麼會知道?」
另外,提到佢今年初喺微博貼出同日本辣模藤井Lena嘅合照,被問到戀情進度時,大東反應相當大,先倒退兩步,再表情凝重咁表示:「今天是想討論關於小丸子老師的紀念會,大家一直問八卦,我覺得很難受。」

(資料來源:網上截圖/連結)