【群星點唱】扮二胡引劉德華垂青 張繼聰自薦做表演嘉賓

劉德華即將舉行一連廿場「my love Andy lau劉德華 world tour 2018」跨年演唱會,距離開騷仲有半個月,繼古天樂點唱,叫華仔唱南音之後,一班圈中人包括吳君如、陳慧琳、張繼聰、胡杏兒、薛凱琪、宣萱、雨僑、蔡潔等,楊祐寧、彭于晏都相繼拍片點唱,佢哋都有自己鍾意嘅歌曲。
君如點唱之前先追飛,而佢點唱嘅《一起走過的日子》絕對係華仔其中一首經典金曲,張繼聰以人聲模仿當中嘅二胡前奏,神似程度令佢大膽自薦要成為演唱會嘅表演嘉賓,而陳慧琳就誠意十足,點唱同華仔嘅合唱歌《我不夠愛你》之餘兼自己唱埋一份,而杏兒嘅心水就係《絕對在乎你》,佢話最鍾意chorus部份,人妻雨僑就點唱《情深的一句》。
至於來自台灣嘅楊祐寧同蔡潔品味一致都係點《笨小孩》,而彭于晏就比較貪心要點兩首,分別係《我和我追逐的夢、《來生緣》。咁多圈中朋友點唱,唔知華仔會唔會一一滿足到大家嘅要求呢?
(資料來源:網上截圖/連結)