【有片】【有仔萬事足】杜德偉一家三口開餐 肉緊攬住囝囝錫完又錫

56歲嘅杜德偉(Alex)兩年前做咗爸爸,佢老婆Ice為佢生咗B仔Alex Junior(AJ)之後,做咗爸爸嘅杜德偉就有仔萬事足,經常做湊仔公陪囝囝游水、行街街甚至同囝囝一齊唱歌,尤其是AJ肥嘟嘟好可愛,杜德偉當然畀個仔融化咗,成日將親子溫馨相放上社交網同朋友分享。
日前夜晚8點幾,傳媒記者就見到杜德偉一家三口去中環一間好出名嘅日式燒肉店開餐,原來杜德偉約咗御用化妝師Hetty Kwong及一位女友人一齊食飯,幾個人邊食邊吹水,食得十分開心。
食到10點幾,AJ就不停行嚟行去,因為佢太可愛,Hetty跟另一女友人都忍唔住要搵AJ影合照,杜德偉都加入埋一齊影,由Ice揸機。期間杜德偉忍唔住又攬又錫又囝囝,錫咗好多次,可見佢真係錫到個仔燶。影完相之後,AJ喺店內四圍遊,杜德偉就做跟班跟住個仔四圍行,之後AJ攞枱面啲糖食,佢都有同爹哋分甘同味,攞糖畀爹哋食。杜德偉臨走時,店員叫杜德偉簽名留念,杜德偉都冇托手踭,喺簽完名同埋單之後,杜德偉就同老婆拖實囝囝行去附近攞車,而Hetty同女友人臨走時,都好唔捨得咁再錫錫AJ先至離開,可見AJ真係好討人喜愛。

https://www.youtube.com/watch?v=KvsQWmR0hh4
(資料來源:網上截圖/連結)