盛傳日前秘產第三胎 栢芝飽滿曝光

神隱半年嘅張栢芝上月25日被傳在養和秘密生仔,有指BB嘅爸爸係年約60歲新加坡富豪,栢芝一直未有回應,令生仔傳聞更加似層層;噚日栢芝終於喺社交網曝光,相中嘅佢戴咗黑超,面頰明顯比以前飽滿咗,着紅色衫包到上頸,唔知係咪怕吹風呢,栢芝仲舉V影相,心情靚靚。
飲食作家Bonnie在社交網晒栢芝合照,另一張相係同栢芝細仔Quintus合照,Bonnie留言:「今日小朋友遊樂日又撞到好姊妹Ceci,Quintus愈來愈高大靚仔呀!」
Bonnie噚日接受傳媒電話訪問表示:「今日大家去深灣遊艇會湊小朋友時撞到,佢同細仔一齊過咗嚟,佢話大仔喺屋企玩電腦。」問到栢芝係咪生咗第三胎?Bonnie表示:「其實我真係唔知,不過見到佢今日狀態,我認為佢唔係啱啱生完小朋友,因為冇理由咁快出門吹風。」
原來Bonnie同栢芝識咗10年,因為大家都有小朋友,近4、5年經常約埋一齊湊仔,問到有冇見過栢芝男友?Bonnie話:「以我所識嘅佢,一直好專注小朋友同屋企,佢好努力賺錢都係為咗小朋友,從來冇聽過佢拍拖。」
問到幾耐冇見栢芝?Bonnie坦言:「有一段時間冇見,差唔多半年。」對於有傳栢芝呢半年匿埋生仔,Bonnie依然話唔覺得係,而記者指相中嘅栢芝肥咗,Bonnie話:「佢件衫鬆身啫,佢話最近喺大陸返嚟湊小朋友,我仲問佢有冇滑水?佢話上年整傷十字韌帶,冇滑一段時間。」

(資料來源:網上截圖/連結)