【有片】陳瀅暗撻失戀陳家樂 甜蜜餵食魚生

29歲「宅男女神」陳瀅(Jeannie)前年與四太梁安琪嘅大仔何猷亨爆分手,之後二人仍頻頻約會,一齊睇煙花,又甜蜜茶聚,但卻否認翻撻。「女神」回復單身梗係多人追,緋聞一隻手數唔晒,周志文、張振朗、林景程、溫家偉、方力申、羅天宇……仲有「衣架大王」個仔劉德俊等等,魅力沒法擋。
而陳瀅嘅緋聞男友名單,似乎又要再添一員,就係早前為失戀爆喊嘅陳家樂!
大前晚(1日)約7點,有傳媒發現中環萬宜大廈一間好平民化嘅日本餐廳,遇見陳瀅同陳家樂一齊撐枱腳。知情人士表示陳家樂較先到達餐廳,由於係周六晚上,好多OL都放假,所以餐廳比較少人。佢話:「陳家樂嚟到坐咗入面,陳瀅之後到就坐外面,佢哋叫咗好多嘢食,佢哋傾得好投契。」見陳家樂幫手燒嘢食,同陳瀅好似有講唔完嘅話題。
佢哋共用一碟醬油,見家樂想將魚生遞向陳瀅嘴邊,陳瀅亦有低下頭,隱約聽見佢笑咗幾聲,但最後都冇食到,家樂自己食番。雖然餵食失敗,但家樂笑得好甜,個樣明顯好冧。大約8點,兩人便埋單離開。
其實陳家樂同拍拖近4年嘅余香凝都係分咗手幾個月,陳家樂一度傷心到流下男兒淚,連開工都冇晒心機,。估唔到家樂治療情傷嘅速度都好快,據悉佢同陳瀅最近合作拍《廉政行動2019》,未知是否日對夜對,培養出真感情?!

https://www.youtube.com/watch?v=ShUkxC4TQ_8
(資料來源:網上截圖/連結)