【特別題材】劉美君自監自演做年輕外婆 同沈震軒演情侶

由劉美君(Prudence)、江若琳(Elanne)、沈震軒及雨僑等主演嘅ViuTV新劇《好人好姐》,今日喺太子道進行開鏡拜神儀式,出席演員還包括陳曼娜、張建聲、郭奕芯、艾威、林熹瞳及江芷銦等。該劇由劉美君監製,劇情講述江若琳飾演劉美君女兒並有一個12歲女兒江芷銦,故事圍繞三代人關係。
劉美君話故事描寫佢年輕當婆婆,沈震軒係佢嘅情人,Prudence話:「好多人話我同佢都好襯、好sweet,我覺得佢個性格同個角色都吻合,而佢以前都係做壞蛋,今次呢個角色好唔同。江若琳做我個女,喺故事裏面佢淨係識戀愛,全家最成熟係我個孫,現實中我個女冇咁鍾意拍拖,反而我最鍾意拍拖,我最近一年幾冇拍拖,順其自然。」《好》劇暫定15集,Prudence表示唔會急拍,都係用實景希望更有電影感。沈震軒指今次係ViuTV自家製,每集1小時長劇集,希望取得好成績。
江若琳喺戲中有個12歲女兒,由江芷銦飾演,Elanne話:「阿女好乖好聰明,計落我真係生得佢出,我都有問佢媽咪,可唔可以將個女畀咗我,我真係好鍾意女仔,佢好乖拍戲之餘,勤力學業,成日問住有冇功課做。」本月23日擺酒結婚嘅Elanne表示,近日非常大壓力,佢話:「齣劇預計拍到月中,自己好大壓力,因為仲未有時間派帖,好多朋友都問我係唔係唔請佢,自己都好驚,每日發惡夢。」Elanne透露,完成擺酒後兩日便會出發度蜜月。

(資料來源:網上截圖/連結)