【有片】【紀錄片妻女唔捧場】同古仔爭最喜愛男歌手 Eason打定輸數

陳奕迅(Eason)同佢嘅DUO團隊自2010年起喺世界各地巡迴演出,以及唱《L.O.V.E.》製作期間嘅種種點滴,剪輯拍成紀錄片《L.O.V.E. In F.R.A.M.E.S.》,噚晚Eason佢哋喺太古城舉行放映及分享會,除Eason外張敬軒亦有現身支持。
Eason受訪時表示呢套紀錄片係想畀大家明白每一首歌製作背後嘅理念,佢笑言:「唔知其他人反應係點,可能其實根本唔想知,所以更加想知道觀眾睇完後嘅反應。」佢話呢套片由剪輯到0依家已經睇咗四次:「每次睇完都有唔同嘅感受,喺片入面我嘅搞笑位0依家睇返覺得唔好笑,有啲感覺係不如過咗去就算啦。」不過就直言太太徐濠縈係冇興趣睇,而囡囡亦都未睇,因為忙於應付考試。
Eason又以早前睇完以樂隊QUEEN改編嘅電影《波希米亞狂想曲》舉例,佢話:「套戲我睇得好感動,QUEEN嘅歌好多都係七、八十年代創作,距離咁多年但感染力依然喺度,我想講嘅係有時做音樂唔一定會即刻令人明白,無論樂迷鍾唔鍾意,每一個評論同批評我哋都會聽,當然有時覺得唔好嘅係有啲字眼太攻擊性。」
紀錄片中嘅感動位係咪講緊阿妹(盧凱彤)嘅片段?Eason話:「都係㗎,我依然係好掛住阿妹,佢嘅影象同聲音可以透過呢個方式永遠保留,好榮幸可以Capture到,呢日我哋變老之後都可以睇返。」
講到碟內其中一首歌《可一可再》,近日被指旋律同韓國歌手尹鐘信嘅《一月到六月》相似,Eason話有聽到相關批評:「我原先以為自己首歌同另一首英文歌相似,始終音符係得12個,我哋唔係抄,我自己知咪得囉,但嗰首《一月到六月》都係幾好聽嘅韓國歌。」又笑言對被指抄歌感榮幸:「成日都係話嗰幾個,今次終於輪到我喇。」
提到今年叱咤我最喜愛男歌手五強有古天樂入圍,仲有網民特登將Eason同古仔以前合作嘅電影片段拎嚟惡搞,問到覺唔覺得古仔係勁敵?Eason話:「唔知,好難講,大家投咗咁多年俾我,如果今年唔係我都好正常,不過網片整嗰條片我有睇,整得好好,好有心機。」

https://www.youtube.com/watch?v=qdgS24zIDoU
(資料來源:網上截圖/連結)