【有片】為老婆梁潔華病情憂心皺眉頭

黃日華太太梁潔華13年尾患血癌,經化療後已經康復。不過,上個月突然傳出梁潔華癌症復發,情況令人擔憂。不過,梁潔華囡囡黃芷晴上星期四(6日)出席活動時,就澄清媽咪唔係血癌復發,而係今年8月聽從醫生建議做咗個骨髓移植手術,又話媽咪手術好成功,佢媽咪已經返咗屋企休養,但係未來仲有一段時間繼續觀察,睇吓有冇出現排斥,令佢同爸爸暫時放下心頭大石。
黃日華為咗老婆個手術,近排都幾乎停工休息,全天候照顧老婆,百分百嘅好男人,就正如近期無綫深夜重播嘅《義不容情》入邊佢飾演嘅丁有健一樣,都係有情有義嘅好男人。
雖然近排黃日華要照顧老婆,不過佢都有抽時間同明星足球隊班波友踢波抒壓。日前下午3點左右,傳媒喺九龍灣一個足球場見到明星足球隊踢波,包括林敏驄同羅鈞滿等等。林敏驄同羅鈞滿等人一早到達球場練波,黃日華就較遲出現。當佢到場之後,就畀隊友集郵,華仔影相時都有展現笑容。不過,一影完相,華仔就靜靜咁坐低撳電話,仲不時皺眉頭,似乎個樣好煩惱咁,冇同其他人一齊練波,而佢同隊友企喺球場傾偈時,都不時皺晒眉頭,唔知會唔會為老婆手術後康復情況擔心。
不過,黃日華一落場踢波時,即刻成個人生猛晒,尤其是佢入咗波之後,笑到四萬咁口,跟住自己舉起雙手拍手掌。而當日黃日華踢到5點幾離開,都冇約埋班隊友食嘢攤唞,而係一支箭開車返去大埔寓所陪老婆。

https://www.youtube.com/watch?v=eyuL3DxBESM
(資料來源:網上截圖/連結)