【大台慳到盡】索女去晒邊?無綫取消製作2019月曆

作為香港電視一哥嘅無綫,近年業績強差人意,由過往年賺十幾億元,跌至去年只賺2.4億元,連續第4年下降。裁員消息更加係未停過,早前就解散咗體育組,TVB周刊停刊,又結束16廠運作,兼大幅裁減TVBI及Broadcast Operation Department,保守估計約有逾百名員工被裁。
2018年接近尾聲,無綫為咗慳錢真係慳到好盡,過去每年都會安排藝員影月曆,送畀一班廣告客戶、員工、傳媒朋友等,而藝人亦可以每人攞到約十個月曆返屋企,送吓畀街坊同親友,與眾同樂。但可以因為免費派發,無綫今年都唔想再嘥錢,所以就決定唔安排藝人影2019年嘅月曆喇。
據悉唔少藝人都大嘆可惜,因為有份拍攝嘅藝人,亦係大台來年力捧嘅指標。好景時候,無綫會因應藝人的talent拍攝唔同月份嘅主題,型男、索女,以劇集包裝等等,睇番10年前即2009年嘅無綫月曆,剩係講8月份,已經出動當年仲未做視后嘅胡定欣、呂慧儀、李亞男、陳自瑤、楊秀惠等索女一齊影泳裝,個個騷長腿,真係好吸睛。可惜去年無綫就已經開始「縮皮」,有兩個月份係大合照,其他都係劇集海報宣傳,真係慳水慳力!

(資料來源:網上截圖/連結)