政府建議修訂《逃犯條例》修訂搞到滿城風雨，唔少藝人都有喺社交網站或出席集會表態及分享感受，繼早前譚詠麟嘅言論引起唔少討論後，噚晚女廚神、KOL兼主持TVB 節目「媽媽唔易」造」」嘅「「玻璃朱」朱庭萱（Bonnie）喺網上嘅言論亦同樣惹嚟熱議。朱庭萱喺Facebook回應網民留言話：「其實點解睇嘢唔可以睇番轉頭？可能人哋元朗居民唔抵得班黃絲蝦蝦霸霸，自組民團去反抗佢哋呢？警察調兵去清場睇住遊行、你哋又圍人哋警總、又鬧人哋黑警、狗…轉頭打比警察求救、又投訴人哋唔聽電話…你哋自己有無覺得有問題同好矛盾架？當然，打人真係唔啱啦，但永遠一隻手掌拍唔響。某部分市民對黃絲已經忍無可忍、才會用咁激進嘅方法唧…正等於你哋都係用同一藉口話對政府忍無可忍先要咁激進去爭取一樣囉。點都好希望所有人都可以冷靜的。」。唔少網民睇完佢嘅偉論後，都認為佢係冷血、冇良知及搏見報等等。
之後，朱庭萱喺社交網站發文重申自己並冇支持黑社會及絕對不支持暴力，希望大家唔好誤會，同埋佢為留言令大家唔舒服及不滿道歉。不過唔少網民睇完都表示唔收貨，紛紛留言話：「咪再兜啦！」、「對妳超失望」、「無人性既說話都講得出，用一堆厚粉濃妝去掩飾自己內心，樣膠都算了，心又膠，腦裝???」、「不知所謂！」、「唔係立場問題, 係良知問題, 一樣你無既野」及「原來你支持黑社會解決問題！好野！」等等。
朱庭萱原本係某貴婦煲群組嘅admin，不過因為佢嘅言論、刪除留言及封鎖帳戶，其餘幾位admin就表示不認同佢嘅言論及毫不知情，仲即時取消佢嘅成員身份。
喺今個書展，朱庭萱有新書推出，不過唔少網民已經揚言罷買。另外，《飲食男女》啱啱亦喺社交網站指同朱庭萱嘅合作喺2017年已經完結，日後亦唔會再同佢有任何合作計劃。
